Manggarar Adat Di Atas ni Bangke

Sada keluarga, tadok ma goarna si Monang dohot inantana si Puti. Dung marrumatangga, tubu ma anak siangkangan boru, si nomor dua baoa. Di na mamungka parsaripeon nasida, dang lao dope manungguli utang tu hulahulana. Salpu ari, salpu minggu, salpu bulan, salpu nang taon, tung so marhusor do parngoluon ni si Monang. Ido umbaen na so mar na digarar adatna .

Di sada tingki, monding ma inanta ni si Monang, ima si Puti. Disungguli dongan sahuta raja panuturi ma, didia tinggal ni hulahula ni si Monang, asa dialapi.Tung borat situtu do roha ni si Monang pabotohon alamat ni hulahulana i. Alai tung so boi do mardalan adat partuat ni si Puti, ia so ro hulahula manaputi boruna.

Dielek dongan tubu dohot pamoruonna ma si Monang, asa dipaboa alamat ni hulahulana. Pola do marjugul ibana, "Boha do patuathon inanta on, molo so adong hulahulamu?" Ninna sahalak natuatua. Dung torop na mandok hata tu si Monang, muba ma rohana, dipaboa ma alamat ni hulahulana i. Dung i, disuru ma pamoruonna mangalapi.

Borhat ma utusan sian pamoruonna

"Horas ma di raja i.."

"Horas.." Ninna raja na didapothon, ima hulahula ni si Monang. Tadok ma goarna si Togar.

Togar : "Songon na ro hamu.. Tiniptip sanggar, bahen huruhuruan. Jolo sinungkun marga asa binoto partuturon. Ise do hamu naro on, takkas ma hamu marboaboa."

Pamoruon ni si Monang patandahon diri, dipabotohon ma harorona, na paboahon naung marujung ngolu ibotona si Puti na nialap ni si Monang .

"Molo ido nidokmu Amangboru, dang boi hami ro, ia so jolo digarar laekku adatna tu hami.."

Utusan : "Tulang na burju, huboto hami do hamu na elek marboru. Molo tung adong hahurangan ni pamoruonmu, nanget ajar-ajari raja i. Madabu jarum tu ramba na potpot, dang diida mata, alai diida roha. Takkas do diboto raja i hahurangan ni pamoruon muna. Molo tung so boi dope hupasangap hami raja i, anggo apala demban santampuk pasahaton nami do, na laho pasangaphon raja i."

Togar : "Antong molo songon i do nidokmu, ro pe hami. Andigan pangarapoton, asa huboto hami ro mangadopi ulaon i.."

Utusan : "Mauliate malambok pusu ma hupasahat hami tu raja i, ala dioloi raja i do pangidoan nami. Husakkapi hami annon, jam pitu bot ari ma amang raja, pangarapoton, asa rade ma raja i .

Togar : "Nauli ma i Amangboru, pabotohon hamu ma haroro nami.."

Mulak ma utusan sian bagas hulahula ni si Monang. Dipabotohon ma tu dongan tubu, na rade do hulahula pasahathon na hombar tu partuat ni ibotona si Puti, alai marpangidoan hulahula i, asa jolo dipasahat adatna. Martonggo saripe ma nasida, pasada tahi. Ditolopi dongan tubu ni si Monang ma pangidoan ni hulahula i.

Dapot ma tingkina pangarapoton

Paidua ni suhut : "Amanta raja, inanta soripada na liat na lolo, na manghaholongi hami. Nunga dapot ombasna, dapot ma tingkina, naeng mulaanta ma pangarapoton, asa tabuat ma hundulan naung huparade hami.

"Di hamu hulahula nami dohot tulang nami, asa hundul ma raja i dijolo nami, hundul di karosi songon ganti ni lage tiar. Asa tiar ma parhorasan, tiar panggabean di hita saluhutna.."

Dung pungu sude, dipungka ma ende dohot tangiang.

Suhut na marhaha maranggi manjaha jujur ngolu.

Goar : Puti br T, boru ni tulang nami sian huta adu i

Tubu : . . . . . .

Marhamulian tu Monang S taon nasa on,

tubu ma sada boru, sada baoa jala dang adong dope na marhasohotan. Di bagasan parsahiton do ina nami on, na sataon na bagas. Marujung ngolu ma ina nami on, nantoari pukkul opat. Ima songon jujur ngolu na boi hupasahat hami di tingki on, na hurang lobi, ajari hamu hami. Pinasahat ma tu dongan tubu, na laho manguduti ulaonta. Boti ma.

Paidua ni suhut : "Mauliate ma di hamu suhut bolon nami, nunga tung takkas hupaihutihut hami jujur ngolu ni ina na tahaholongi on. Songon i ma, di hamu hulahula dohot tulang nami, nunga rap mambege hita songon jujur ngolu ni ina nami na tahaholongi on, ala so adong dope anakhon ni ina nami on na marhasohotan. Ia ulaon mangido tangiang ma ulaonta, partangiangan ma raja nami, asa tuturi hamu hami pamoruon muna na hurang malo on. Partingkian hupasahat tu raja i .

Horong ni hula hula dohot tulang : "Mauliate ma di Tuhanta, hipas do hami ro sian tonga ni bagas nami laho mandapothon hamu, suang songon i nang hamu pamoruon nami hipas do hudapot hami. Asa on pe.. Di hita na marhaha maranggi, songoni nang haha ni parhundul nami, ise ma hita na laho manuturi ulaon ni pamoruonta?"

Tulang : "Sisada hata ma hita.."

Hulahula : "Antong molo songoni, sada silompa gadong, dua silompa puli. Molo tung au pe na manghatahon, sude ma hita na taruli.."

"Mauliate ma di hamu suhut nami, nunga sisada hata hami dohot tulang muna, haha ni parhundul nami. Amangboru na burju, takkas do huboto hami, siboto adat do hamu jala anak ni raja. Asa jolo pasahat hamu ma Amangboru parsantabian muna.. Dang hea dope hudalani hami huta ni Amangboru nami, patandahon na patimbo parik iboto nami on, di huta ni raja i. Nunga nasib nami hape, na gabe patoruhon iboto nami on di hami. Alani i, asa boi hututuri hami ulaonta on, pasahat hamu ma jolo demban tiar. Asa tiar parhorasan, tiar panggabean di pinompar ni iboto nami on.."

Paidua ni suhut : "Gabe Tulang..! Molo tung di tingki on pe hupasahat hami, somba ni uhum, somba ni adat, marpamuati ma raja i di hahurangan ni hami pamoruon muna on. Boan hamu dibagasan tangiangmu, asa tung lam tu dengganna dalan ni ngolu di pinompar ni ina nami na tahaholongi on. Asa anggiat tung boi hupasangap hami, hamu saluhutna horong ni hulahula dohot Tulang nami."

"Mangarade ma hamu Tulang, asa ro hami pasahat batu ni demban ni raja i.. Otik so sadia na hupasahat hami, las ma roha ni raja i.."

Borhat ma si Monang dohot pinomparna marsomba tu hulahulana songon i nang tu tulangna, pasahat batu ni dembanna.

Hulahula : "Mauliate ma di hamu Amangboru nami.. Didok natuatua: madabu jarum tu ramba na potpot, ndang diida mata, alai diida roha. Nunga nasib nami hape ingkon di atas ni bangke ma jaloon nami, somba ni uhum, somba ni adat ni iboto nami on. Alai nang pe songon i, boanon nami do di bagasan tangiang nami, songon hata ni situatua na mandok: Pinantikhon hujur di topi ni tapian, manang tudia pe mangalangka lae dohot bere, ibebere nami on, sai tusi ma dapot parsaulian."

"Eme ni si Tambatua, parlinggoman ni siborok. Amanta Debata do silehon tua, tongtong ma hamu diparorot."

"Sahat sahat ni solu, sahat tu bontean ni Tigaras toho di rondang ni bulan. Sahat ma lae, bere, ibebere nami on tu panggabean, jala horas tongtong diiringi Tuhan.

Horas. . . Horas. . . Horas. . . . . . !

Dung sidung dipasahat somba ni uhum somba ni adat na, diihuthon ma mangarangrangi taringot ulaon paborhathon si Puti tu inganan parsatongkinan i. Dos ni roha sibaen na saut, singkop do mardalan ulaon adat i, nang pe di jolo ni bangke. Ima halobian ni Adat Batak di Toba, Silindung, Humbang, dohot Samosir.

Horas ma hita ganupan, na hurang lobi di guritan on, parjolo marsantabi. Horas

Adat na hinipu : Manggarar Adat Di Atas ni Bangke

Panggurit : Goksen Binhot Siadari