Sai Gabe Ma Ho Pariban, Tu Simamora i

Based on a true story of holong na so marbalos

Najolo do sorita on, tingki so masa dope HP dohot medsos. Molo mandabu holong, surat na marharotas bunga do biasana dipangke angka remaja tingki i. Songon ido nang ahu.

Adong ma hubereng-bereng sada anak boru na uli, goarna si Uli (samaran), boru ni partulangon sian hombar huta, jala dongan markoor di N-HKBP. Adong muse kompakhu doli-doli, dongan sahuta na margoar si Gomong (samaran). Di sada tingki hudok ma tu si Gomong: “Pasahat jo surathu tu si Uli boh.”

Kebetulan sakalas do si Gomong dohot si Uli di SMA Negeri I Doloksanggul. Sataon nasida di torunghu. Au kalas tolu, nasida kalas dua.

“Lomo roham tusi?” Ninna si Gomong.

“Olo bah, uli hian huida,” Alushu.

“Ido tutu ate? Bontar imana poang, ganjang muse obukna,” Mengkel suping si Gomong tu au.

Hulean ma surat asa dipasahat si Gomong tu si Uli. Ganup ari tarpaima au di balos ni surat i. Gok ma hira-hira tolu bulan dang marbalos surat i. “Ai dang marbalos surathi, naso olo do imana?” Ningku tu si Gomong. “Imada, molo binereng songon na olo do nian,” Alus ni si Gomong. “Ale asa tumangkas baen ma muse suratmu.”

Hubaen ma antong surat kedua. Anggo sahalion lobi serius ma dah. Ingkon malliting do. Anti ditolak. Pola do saminggu manurat. Dung sae, hupasahat ma muse surat i tu si Gomong asa dipasahat tu si Uli. Anggo sahalion marbalok-balok do. Hutraktir do si Gomong jajan sabutong-butongna di kantin ni si Binjora di huta Pasaribu. Tong ma sai hupaima balosna. Alai sahat tu na tammat au sian SMA, dang marbalos surat i. Nga malas be au mangusoi boasa dang dibalos. “Berarti na ditolak ma cintakki,” Ningku di bagas roha.

Dung tammat SMA mangaranto ma au tu Bogor. Laos ima dalan mangaluphon si Uli, hape dang boi bah. Tong do sai huingot bohina arian nang borngin. Dung hira-hira sataon di Bogor, mardalani mau au tu Pulo Gadung, Jakarta Timur, naeng marsatur dohot par amangtuaon.

Pas lalap hami marsatur, roma sada anak boru manaruhon kopi. “Nion kopim bang,” ninna anak boru i tu au. Eh si Uli, hutanda soarana. Naeng skakmat hian nama, tompu hupaso. Tor manaili au. “Bah Uli, sadihari ho dison pariban?” Tarhatotong au mamereng ulina. Taroktok marlobok-lobok songon ogung. Tung so sangka rohangku na di joloku tinongke ni roha saleleng on. Si uli pe tarunduk hera naso diboto mangalusi.

“Ai berengku doi,” Ninna amang tua i mancairhon suasana. “Baru lulus imana sabulan na salpu, jadi ro tu Jakarta naeng lanjut kuliah. Alai tahe hamu majo manghatai adong saotik ulaonhu.” Mardalan amang tua i tu dapur mangalean tingki tu hami.

“Hebat do ho bah,” Ningku nanget mamungka hata dung mijur amang tua i. “Dua hali hubaen surathu tu ho. Hupaima balosna ganup ari, laos so adong. Molo so olo ho, dok antong na so olo.”

“Aha do nimmu bang, ho do na so olo tu au. Sai hupaima suratmu dang marnaro. Naeng hubaen surathu tu ho, alai dia masa borua parjolo mandok hata? Sai maila au molo pajumpa hita, dang tahan au memereng bohim. Ringgas pe au tu N-HKBP na naeng marnida abang do. Gabe si Gomong do mambaen surat tu au,” Ninna si Uli huhut manetek iluna.

“Bah, boha i, jei adong hian do roham tu au?” Songon na songgot huhilala. Gurgur ma muse semangathu. “Jei tarpaima do ho di hatanghu, ate?

“Ido bang,” Ninna si Uli nanget.

“Bah, molo toho do na nidokmi, ba saonari ma tapajadi. Sai tu ho dope rohangku,” Hupasang engkel suping paling manis, huhut hutiop tanganna.

“Nga tarlambat bang. Nga adong hutiop hata,” unduk si Uli jala ro iluna.

Pintor lemas bah, tanggal holi-holi sian sibuk. “Hata sian ise, si Gomong do?” Soaraku pe songon angsa na amporotan.

“Daong bang, marga Simamora do sian Bonandolok. Nga leleng dijonok-jonoki abang i au, alai ndang pintor hujalo, sai hupaima do hatam. Alai huida dang adong roham tu au, apalagi borhat abang mangaranto dang martinggal hata, hujalo ma hatana. Molo si Gomong, ise ma olo tusi. Ditongos i suratna tu au, alai ditipex-tipex muse goarna.”

“Ise Simamora i tangkas jolo paboa, Soter Simamora do?” Huingot ompung on do anak muda ni Bonandolok na hira-hira boi manaingi au 😁

“Daong bang,” ninna.

“Kan dang dipasu-pasu dope hamu? Boi dope direvisi hubungan muna. Tu au ma ho, sek holong rohangku tu ho,” Songon na tubu muse semangathu.

“Daong bang, ninna damang, togu urat ni bulu, toguan do urat ni padang. Togu hata ni uhum, toguan do hata ni padan. Dang oseonku janjiku tu abang i,” Ninna huhut ditatap simalolonghu.

Tamba lemas au bah. Sial nai. Marbalos hian do hape holonghi, naso dipasahat si Gomong do surathi. Alai boasa dang sahat ate? Jempek hata dohonon, dung ganjang hami marsorita, habotoan ma na surathi do dipangke si Gomong mandabu holong tu si Uli. Ditipex ibana goarhu, dibaen goarna di toru ni tanda tanganhu.

Dang leleng parmisi ma au mulak tu Bogor. “Sai gabe ma ho pariban tu Simamora i, alai molo sirang hamu paboa tu au,” Ningku huhut hujalang si Uli. “Mauliate bang. Abang pe sehat-sehat ma da?” Dungkon i dang hea be hami pajumpa. Hubege barita jadi do si Uli tu Simamora i. Horas jala gabe do nasida di Sidikalang. Si Gomong tinggal Dumai, au di Bekasi, marpulu taon dang pajumpa.

Jadi, unang tatiru si Gomong i, tapillit na boi haposan asa sahat na taparsinta.

oleh: Bilson Simamora