Tona ni Turiturian
Adong ma 4 halak na marhaha anggi pinompar ni sada ama na tarbarita di sada luat. Dung magodang na opat i, tubu ma angka roha na naeng manghaliangi arta ni amongna i. Na tolu halak sada tahi ma nasida naeng pasidinghon anggina i, ala so dos ulaon nang parrohaonna. Tubu ma bada dung marujung ngolu ni natuatuana i.
Martahi ma na tolu i, jala marragam do dalan dibaen boha ma asa misir na sada naso satahi i. Sipata didok ma parbegubegu manang pangulaula sahit ni jolma. Dung leleng, saut do tahi nasida. Misir ma na sada i tu luat na dao, na so tartatap ni na tolu nai.
Sonang ma roha ni na tolu i, jala martahi ma mamodahon tu angka pinomparna: "tolu ma hami na martinodohon amongmuna". Laos sai diingot pinomparna i ma, na tolu do among nasida na martinodohon. Alai anggo na sada nai, naung di parjalangan i, sai ditonahon do tu pinomparna: "opat ma hami amongmu na martinodohon". Jala girgir do amongna i manggoari angka na marhaha anggi, dirohana unang gabe mago ise do na gabe parsolhotna molo tung mulak haduan. Alani posi ni parbadaan nasida i, dang hea be mulak ama na sada i, holan tona do dipasahat na opat nasida martinodohon.
Dung marpiga sundut, maduma ma pinompar ni ama naung marjalang i, tubu ma sihol naeng pajongjong batu parhundulan patudu naung gabe di pargellengon dohot hamoraon nasida. Alani tona i, ndang na lipe sian pinomparna i amongna na martinodohon dohot parhutaan ni ompungna i. Di sada tingki mulak ma nasida mandapothon pinompar ni hahana i. Dung martutur, maol tarjalo ni pinompar ni na tolu na di huta i, ai ditonahon holan tolu do marhaha anggi ompung nasida. Songon dia pe dipatorang pinompar ni na marjalang i, tung maol do tarjalo roha ni nasida alani tona. Ai dipeop do poda i, jala na so tupa meret sian tona ni amongna i.
Dang dapot be sada ni roha, ai sai margolgol do nasida di pandapotna be. Tung so lao do rohana, ai adong do dongan sahuta ni ompungna i nang pamoruon dohot hulahulana. Holan manghatindanghon pamingkirionna be, naso tupa manjalo hata ni na deba, ingkon tonana i do na toho. Godang ma tubu angka siboto turiturian dohot siboan tona di nasida, didok anak ni raja naso tupa manjalo manang mambege hata ni halak tung pe aha na masa.
Saut ma nasida dang marsada di ganup angka ulaonna, siboan tarombona dohot turiturianna be ma. Tona na binegena i dang dirajumi jala dang dilului tudia do tahe mandiori aek natio. Godang do margulut di jae tingki gindor aek i, marsipatudu hajagoanna dohot hamaloanna. Alai dang lao rohana laho mandiori tu julu, nang pe tangkas diboto nasida mual natio i di julu. Songon i ma marsundut-sundut ditonahon tu sude angka pinomparna be, sai dilului do dalan asa holang patudu harajaon nang hasangaponna be.
Poda na uli: aha pe na masa di hamu angka na martinodohon, tung unang ma ditahi roha muna lao pasidinghon haha manang anggi muna i. Dumenggan ma hamu marsipataluan roha, asa anggiat tontong adong hasadaon ni roha di ganup lao mangadopi ulaon las ni roha nang ulaon na marhabot ni roha tu joloan on. Memehon hamu ma angka na denggan sian roha na tulus tu pinompar muna, asa anggiat unang gabe sitait bulu na suhar nasida ro di marsundut-sundut. Horas
Post a Comment for "Tona ni Turiturian"
Silahkan berkomentar bijak tanpa asumsi sesuai dengan topik artikel. Komentar spam atau share link yang tidak relevan akan dihapus. Terimakasih..