Umpasa ni halak Batak
Umpasa ima na marisi hata nauli: tangiang, panghirimon, apul-apul dohot poda. Somalna umpasa on dipakke di ulaon adat Batak, ima ulaon adat na gok (mangadati manang pasahat sulang-sulang pahompu), ulaon na marhabot ni roha (ulaon sari matua manang saur matua) dohot di angka ulaon na metmet: manulangi tulang, mamasuki jabu, dna.
Umpasa ni naposo bulung
(Buat orang-orang muda)
Jolo tiniptip sanggar
Laho bahen huru-huruan
Jolo sinukkun marga,
Asa binoto partuturan
Tubu tobu di atas ni rura
Tubu ema di hauma
Ito na marpahean na rara
Ai boru aha do hamuna
Tudia ma luluan goring-goring bahen soban
Tudia ma luluan boru Tobing bahen dongan
Tudia ma luluan dakka-dakka bahen soban
Tudia ma luluan boru Sinaga bahen dongan.
Manuk ni Pealangge
Hotek-hotek laho marpira
Sirang na marale-ale,
Lobianan na matean ina
Silaklak ni landorung
Tu dakka ni sila-sila,
Ndang iba jumonok-jonok
Tu naso oroan niba.
Metmet dope sikkoru
Nunga dihandang-handangi
Metmet dope siboru
Nunga ditandang-tandangi
Torop do bintang di langit
Sigara ni api sada do
Torop do si boru nauli
Tinodo ni rohakku holan ho do
Ramba na poso
Ndang piga tubuan lata
Hami naposo
Ndang piga na umboto hata
Umpasa manjalo tintin marangkup
(Untuk pasangan saat tukar cincin)
Bulung na martampuk
Bulung ni simarlasuna
Nunga hujalo hami tintin marangkup,
Dohonon ma hata pasu-pasuna
Hot pe jabu i
Tong do i margulang-gulang
Sian dia pe mangalap boru bere i,
Tong do i boru ni Tulang
Sai tong do i lubang
Nang pe dihukkupi rere
Sai tong do i boru ni Tulang
Manang boru ni ise pe i dialap bere
Amak do rere
Dakka do dupang
Anak do bere
Ama do Tulang
Asing do huta Hullang
Asing muse do huta Gunung Tua
Asing do molo Tulang
Asing muse do molo gabe dung Simatua
Umpasa tu na baru marbagas
(Untuk pasangan yang baru menikah)
Dakka ni arirang
Peak di tonga ni onan
Badan muna naso jadi sirang
Tondi muna ma marsigomgoman
Giring-giring ma tu gosta-gosta
Tu boras ni sikkoru
Sai tibu ma hamu mangiring-iring huhut mangompa-ompa,
Anak dohot boru
Rimbur ni Pakkat
Tu rimbur ni hotang
Sai tudia pe hamu mangalangka
Sai tusi ma hamu dapot pansamotan
Dengke ni sale-sale
Dengke ni Simamora
Tamba ni na gabe
Sai tibu ma hamu mamora.
Sahat-sahat ni solu
Sahat ma tu labuan
Sahat ma hamu leleng mangolu
Jala sai didongani Tuhan.
Sahat sahat ni solu
Sahat di parbinsar ni mataniari
Leleng ma hamu mangolu
Jala diiring-iring Tuhan ganup ari
Mangula ma pangula
Dipasae duhut-duhut
Molo burju marhula-hula
Dipadao mara marsundut-sundut
Ruma ijuk
Tu ruma gorga
Sai tubu ma anak muna na bisuk
Dohot boru muna na lambok marroha
Balintang ma pagabe
Tumundalhon sitodoan
Ari muna ma na gabe
Molo olo hamu marsipaolo-oloan
Andor hadukka
Patogu-togu lombu
Sai sarimatua ma hamu,
Sahat tu na patogu-togu pahoppu
Mandurung di aek Sihoru-horu
Manjala di aek Sigura-gura
Udur ma hamu jala leleng mangolu,
Hipas matua sonang sora mahua
Sahat sahat ni solu
Sahat tu bontean ni Tigaras
Pasahaton nami ma ulos siganjang rambu on
Saluhutna ma hita gabe jala horas
Tubu ma halosi
Di dolok ni Pintu Batu
Hami Tulangmu mangulosi,
Debata do ianggo na masu-masu
Aek Sibarabara
Duruna i tubuan tolong
Tung aha pe muse na masa,
Ndang boi mago ianggo holong
Tonggi ma sibahut
Tabo ma pora-pora
Gabe ma hita luhut
Jala sude ma hita mamora
Tubu ma lata
Di toru ni bunga-bunga
Sai tubu ma di hamu anak na marsangap,
Dohot boru na martua
Martantan ma baringin
Mardangka hariara
Horasma tondi madingin,
Matangkang ma juara
Bintang na rumiris
Ombun na sumorop
Anak pe antong riris,
Boru pe antong torop
Tubu ma hariara
Di tonga-tonga ni huta
Sai tubu ma di hamu anak na marsahala
Dohot boru na mora jala na martua
Tinaba hau sampinur
Di tombak Simarhora-hora
Sai lam matorop ma hamu maribur,
Lam marsangap jala mamora
Tangkas uju Purba
Tangkasan ma uju Angkola
Tangkas ma hamu maduma
Tangkasan ma nang mamora
Pinantikkon ma hujur
Di topi ni tapian
Tudia pe hamu mijur
Sai tusi ma dapotan parsaulian
Tangki ma jala ualang
Galinggang jala garege
Tubu ma anak partahi jala ulu balang
Dohot boru na maduma jala pareme
Tubu ma sanggar di holbung-holbung
Tubu arung di honuk-honuk
Tubu ma di hamu anak na malo marpollung
Dohot boru na malo marsonduk
Tubuan laklak tubuan singkoru
Di dolok ni Purbatua
Tubuan anak ma hamu jala tubuan boru,
Dongan muna saur matua
Umpasa mangampu
Bulung ni taen, tu bulung ni tulan
Ba molo tarbahen, sai topot hamu hami sahali sabulan
Molo so boi bulung ni tulan, pinomat bulung ni salaon
Ba molo so boi sahali sabulan, pinomat sahali sataon
Ni durung situma
Laos dapot pora-pora.
Molo mamasu-masu hula-hula, mangido sian Tuhan,
Na pogos hian iba, boi do gabe mamora
Songgop siruba-ruba
Tu dakka ni hapadan
Angka pasu-pasu na ni lehon muna
Sai dijangkon tondi ma dohot badan
Mardakka jabi-jabi
Marbulung ia situlan
Angka pasu-pasu na pinasahat muna
Sai sude ma i dipasaut Tuhan.
Naung sampulu sada
Jumadi sampulu tolu,
Angka pasu-pasu na pinasahat muna,
Sai anggiat ma padenggan ngolu-ngolu
Naung sapulu pitu
jumadi sapulu ualu
Angka pasu-pasu na pinasahat muna hula-hula nami,
Diampu hami ma di tonga jabu.
Turtu ninna anduhur
Tio ninna lote
Angka pasu-pasu pinasahat muna
Sai unang ma muba, unang mose
Habang pidong sibigo
Paihut-ihut bulan
Saluhut angka na tapangido
Sai tibu ma dipasaut Tuhan
Obuk do jambulan
Nidandan ni boru Samara
Pasu-pasu na mardongan tangiang sian hula-hula,
Mambahen marsundut-sundut soada mara.
Tinapu bulung ni sabi
Baen lompan ni pangula
Sahat ma pasu-pasu na nilehon muna i tu hami,
Sai horas ma nang hamu hula-hula
Suman tu aek natio do hamu
Riong-riong di pinggan pasu
Hula-hula na basa do hamu
Na girgir mamasu-masu
Aek na marjullak-jullak, marjullak-jullak sian batu
Jullak-jullakna i antong pamasukon ma tu tabu-tabu
Hata pasupasu na sian hamu hula-hula nami
Ampuon nami ma i antong martonga ni jabu
Umpasa na asing
Martahuak ma manuk
Di bungkulan ni ruma
Horas ma hula-hulana,
Songoni nang angka boruna
Simbora ma pulguk
Pulguk di lage-lage
Sai mora ma hita luhut
Huhut horas jala gabe
Hariara na madungdung
Tu pilo-pilo na marajar
Sai tading ma na lungun,
Sai ro ma na jagar
Sinuan bulu
Sibahen na las,
Ta bahen uhum
Mambahen na horas.
Eme ni Simbolon
Parasaran ni siborok
Sai horas-horas ma hita on
Laos Debata ma na marorot
Sititik ma sigompa
Golang-golang pangarahutna
Tung so sadia pe na tarpatupa,
Sai anggiat ma godang pinasuna
Pinasa ni Siantar
Godang rambu-rambuna
Tung otik pe hata na hupasahat,
Sai godang ma pinasuna
Tuat si puti
Nakkok si deak
Ia i na ummuli,
Ima ta pareak
Aek godang
Aek laut
Dos ni roha
Sibaen na saut
Napuran tano-tano
Rangging marsiranggongan
Tung badanta pe padao-dao,
Tondinta i ma marsigomgoman.
Marmutik tabu-tabu
Mandompakhon mataniari
Sai hot ma di hamu angka pasu-pasu,
Laho marhajophon angka na sinari
Bona ni pinasa
Hasakkotan ni jomuran
Tung aha pe angka na denggan na niula ni tangan muna,
Sai anggiat ma gabe dalan ni pasu-pasu sian Tuhan
Mandurung di aek Sihoru-horu
Manjala di aek Sigura-gura,
Udur ma hamu jala leleng mangolu,
Hipas matua sonang sora mahua.
Dolok ni Simalungun
Tu dolok ni Simamora
Salpu ma sian hamu na lungun,
Sai tibu ma ro si las ni roha
Dangka ni hariara ma pinangait-aithon
Tubu ma di hamu anak dohot boru, sai unang ma panahit-nahiton.
Dangir-dangir ni batu
Pandakdahan ni simbora
Gabe do hamu,
Jala sarimatua asal ma sai marsada ni roha
Tinapu ma andaliman
Andaliman situa-tua
Denggan ma hamu masianju-anjuan
Asa saut gabe jala sari matua
Tubu ma laklak dohot singkoru
Di dolok ni Purbatua
Sai tubuan anak ma hamu tubuan boru,
Dongan muna sarimatua.
Hariara na bolon
Bahen parlape-lapean
Sai tubu ma di hamu anak dohot boru,
Na bolas gabe pangunsandean
Sahat-sahat ni solu
Sai sahat ma tu bontean
Leleng ma hamu mangolu,
Sai sahat ma tu panggabean
Ompunta sijolo-jolo tubu
Martungkot sialagundi
Angka nauli na pinungka ni ompunta na parjolo
Ihuthonon ni na parpudi
Muba dolok
Muba duhutna
Muba luat
Sai adong do muba adatna
Eme na masak
Digagat ursa
Ia i na masa,
Ima ni ula.
Sori manungkun
Sori mandapot
Sai matua marpanungkun,
Tu na nidapot
Tangan do botohon
Ujungna jari-jari
Bangko ni hata sidohonon,
Asal ma jumolo marsantabi
Ramba na poso
Na so tubuan lata
Halak na poso,
Na so umboto hata
Tampuk ni Sibaganding
Di dolok ni Pangiringan
Horas ma hamu na marhaha maranggi,
Jala sai masipairing-iringan.
Bola-bola ni tangan
Sitongka do i bolahonon
Bola-bola ni halak,
Sitongka do i tangihonon
Tinallik landorung, bontar gotana
Dos do anak dohot boru, nang pe pulik margana
Ai dompak marmeme anak, dompak do tong marmeme boru
Andung ni anak sabulan di dalan, andung ni boru sataon
Niluluan tandok
Hape dapot do parindahanan
Tuk do nian pamangan mandok
Alai dang tuk sijamaon ni tangan
Bulu na matoras
Denggan ma i behenon hite
Angka naposo naung matoras
Denggan ma i mardongan saripe
Amporik marlipik
Onggang marbabang
Gabe do parsinamot na otik,
Gabe do nang parsinamot na godang
Martantan ma baringin
Marurat ma jabi-jabi
Horas ma tondi madingin
Tampahan ni Ompunta Mulajadi
Metmet bulung ni jior
Metmetan bulung ni banebane
Denggan do hata na tigor
Dengganan do hata na mardame
Artia mula ni ari
Sipaha sada mula ni bulan
Sai manumpak ma Ompunta Mulajadi
Sai ditambai ma di hita denggan ni hangoluan
Tinaba hau toras
Bahen sopo di balian
Na burju pasangap natoras,
Ingkon dapotan parsaulian
Anduhur pidong Toba
Sirubaruba pidong harangan
Halak na padot mangula
Ido na bosur mangan
Ansimun sada holbung
Pege saharimpang
Menimbung rap tu toru
Mangangkat rap tu ginjang
Ijuk di para-para
Hotang di parlabian
Na bisuk nampuna hata,
Na oto tu panggadisan
Handang niaithon
Na dua gabe sada
Niantan ma pargaiton,
Unang i gabe dalan bada
Hori sada hulhulan
Bonang sada simbohan
Tangkas ma sinungkun,
Nanget masipadohan
Ingkon manat marpiu tali
Ingkon pande marjalin bubu
Ingkon manat mangula tahi,
Ingkon pande mangula uhum
Marluga Sitindaon
Mangan hoda sigapiton
Tu jolo nilangkahon,
Tu pudi sinarihon
Habang ma siburuk
Songgop tu durame
Molo sada ma muruk
Sada ma siboan dame
Tinampul bulung sihupi
Pinarsaong bulung sihala
Unang sumolsol dipudi
Ndada sipaingot na soada
Dengke ni Sabulan
Tu tonggina tu tabona
Manang ise na mangose padan
Tu ripurna tu magona
Barita ni lampedang
Mardangka bulung bira
Barita ni hamoraon ni amangboru nami
Tarsar do sahat ro didia
Sada silompa gadong
Dua silompa puli
Sada pe na manghatahon
Sude ma hita dapotan nauli
Umpasa di na laho marsirang
Pidong Sitapitapi
Habang diatas hauma
Horas ma hamu na hupaborhat hami,
Horas hami na tininggalhonmuna
Dolok ni Panampahan
Tondongkon ni Tarabunga
Sai horas ma hamu di pardalanan
Songoni dung sahat tu inganan muna
Tombak ni Sipinggan
Di dolok ni Sitapongan
Didia pe hita maringanan,
Sai tong ma hita masihaholongan
Eme ni si Tambatua
Parlinggoman ni siborok
Amanta Debata do silehon tua,
Sai luhutna ma hita diparorot
Mangerbang bungabunga
Ditiur ni mataniari
Selamat jalan ma di hamuna,
Selamat tinggal ma di hami
Umpasa mangadopi natuatua
Umpasa Batak sidohonon molo dohot iba mangadopi natuatua na manjalo sipanganon sian angka anakhonna:
Andor halumpang ma togutogu ni lombu
Dohot togutogu ni horbo laho tu Lapo Gambiri
Sai saur ma hamu leleng mangolu,
Paihutihut pahompu sahat tu na marnono dohot marnini
Tinapu bulung ni sabi
Nibutbut pinaspashon
I dope na tarpatupa hami
Ba i ma jolo tahalashon
Hata sian undangan tu natuatua i
Poltak bulan i
Ama ni Manggule
Ro nuaeng angka pomparanmu mamboan sipanganon
Ba dohot hami maulae
Tubu ma singkoru
Di dolok ni Simamora
Sai torop ma anak dohot boru,
Na basa jala sisubut roha
Tubu dingindingin, jonok tu simartolu
Horas ma tondi madingin, pir ma tondi matogu
Sai ro ma nipi na uli, sai leleng hamu mangolu
Haliangan ni nono dohot nini, raphon anak dohot boru
Hata ni undangan tu ianakhon na mamboan sipanganon:
Binolus Purbatua
Laho tu Parsingkaman
Na burju marnatuatua,
Ingkon sai dapotan pandaraman
Laho pe ibana mangula
Sai na dao ma parmaraan
Sai dapotsa na niluluan
Sai jumpang na jinalahan
Taringot sipanganon na binoan muna tu natuatua i:
Disi do gandina
Disi do nang gandona
Disi do daina,
Disi do nang tabona
Sirsir ansimna
Jala hona dohot asomna
Asa dohonon nami ma:
Bagot na marhalto
Di ladang ni Panggabean
Horas ma hami na manganhon,
Lam martamba sinadongan di hamu na mangalean
Ia siula tano do hamu, ba on ma dohonon nami:
Binanga ni Sihombing
Binongkak ni Purbatua
Tu sanggar ma amporik,
Tu lombang ma satua
Sai sinur ma pinahan
Gabe ma na niula
Molo partigatiga do hamu, ba on ma dohonon nami:
Tinampul bulung bira
Bahen saong laho tu ladang
Sai mangomo ma hamu sian tigatiga,
Ba sai maruntung ma sian dagang
Molo tung sipata rugi hamu, ba sai dapot nian songon nidok ni umpasa:
Soban rantingranting
Soban ni Sijamapolang
Ba molo rugi hamu sian antinganting,
Ba sai mangomo ma sian golang
Molo pegawai do hamu, ba on ma dohonon nami:
Tinampul bulung salaon
Dongan ni bulung si tulan
Ba sai naek pangkat ma hamu ganup taon,
Sai tamba gaji tiap bulan
Molo adong di hamu na so hot ripe dope, on ma dohonon nami:
Parik ni Lobutua
Hatubuan ni bulu duri
Na burju marnatuatua
Sai ingkon dapotan rongkap na uli
Baangkup ni i:
Molo adong disi hulingkuling
Sai adong ma disi holiholi
Molo adong disi na so muli
Sai adong do rongkap ni i naso mangoli
Sahat sahat ni solu
Sai sahat ma tu labuan
Leleng ma hamu mangolu
Sai tontong dipasupasu Tuhan
Umpasa di tingki mangapuli
Jotjot do tadok: Tua na so taraithon, soro ni ari na so tarhaishon. Alai dumenggan do dohonon umpasa on:
Ramba ni Sipoholon
Marduhutduhut sitata
Las ni roha dohot sitaonon
Sude do i sian Amanta Debata
Hau ni Gunungtua
Dangkana mardaguldagul
Tibu ma dilehon Tuhanta di hamu tua,
Jala tibu hamu tarapul
Poltak ma bulan tula
Binsar ma mataniari
Tibu ma ro tu hamu soritua,
Singkat ni soro ni ari
Angkup ni i:
Hotang binebebebe
Hotang pinilospulos
Unang hita mandele,
Ai godang do tudostudos
Tamba muse:
Hotang benebebebe
Hotang ni Siringkiron
Unang hita mandele,
Ai godang dope sihirimon
On pe:
Dolok ni Simalungun
Tu dolok ni Simamora
Sai salpu ma angka na lungun,
Hatop ma ro silas ni roha
Tampuk ni Sibaganding
Diatas ni Pangiringan
Tu gabena ma hamu saluhutna
Tondi muna sai masipairing-iringan
Sinuan hariara bahen partungkoan
Di tonga ni huta
Sinur ma na pinahan
Tu gabena na niula
Na di huta unang marmara
Horas-horas ma hamu sasude tumpakon ni Tuhanta na martua
Andor ris ma andor ras
Di dolok ni Lobutua
Torkis-torkis ma horas-horas
Jala dapotan tua
Pinantikkon ma hujur
Di topi ni tapian
Horas ma hamu saluhut,
Jala dapotan parsaulian
Bagot na madungdung
Tu pilo-pilo na marajar
Salpu ma na lungun
Sai ro ma na jagar
Tinapu bulung siarum
Bahen uram ni pora-pora
Na hansit i tibu ma malum,
Sai ro ma silas ni roha
Balintang ma pagabe
Tumundalhon sitadoan
Ari muna ma na gabe
Asal ma hamu masipaolo-oloan
Pir ma pongki
Bahul-bahul pansalongan
Pir ma tondi muna
Tu tambana ma pangomoan
Dangka ni sitorop
Pinanghait-haithon
Tubu ma anak dohot boru
Sitongka panahit-nahiton
Eme ni si Tambatua
Parlinggoman ni si borok
Amanta Debata do silehon tua,
Saluhut na ma hita on diparorot
Umpasa di tingki marhata sinamot
Dia ma langkatna
Dia ma unokna
Dia ma hatana,
Dia ma nidokna
Bona ni Aek Puli
Dolok ni Sitapongan
Sai tubu ma di hamu angka na uli
Sai tamba nang pansamotan
Ranting ni bulu duri
Jait marsijaotan
Siangkup ni hata nauli
Dia ma nuaeng sitaringotan
Ampapaga dolok
Tu ampapaga ni Humbang
Hita do marsogot,
Hita do haduan
Pitu ninna lilina
Paualu jugianna
Nauli do ninna nipina,
Ai dijangkon boru muna do ibana
Ndang tuktuhan batu,
Dakdahan simbora
Ndang tuturan datu,
Ajaran na marroha
Pat ni gaja
Tu pat ni hora
Anak ni raja do hamu
Pahompu ni na mora
Pitu lili nami
Paualu jugian nami
Nauli do nipi nami,
Ai gohan muna ma hajut nami
Mangula ma pangula
Di rura Pangaloan
Molo mangido hula-hula,
Ndang jadi so oloan
Mangula ma pangula
Dipasae duhut-duhut
Molo burju marhula-hula,
Dipadao mara marsundut-sundut
Sambil na tartondong
Dapotsa papaluan
Asa denggan martondong,
Unang marsipailaan
Lubuk ni Siguragura
Denggan do panjalaan
Molo sai mangigil hula-hula,
Olat ni na boi ba tinambaan
Umpasa di tingki mamongoti jabu
(Acara memasuki rumah baru)
Tubu ma salaon
Di topi ni ambar Sihoruhoru
Jabu na uli ma jabunta on,
Hatubuan ni anak dohot boru
Mardangka bulung bira
Martampuk bulung labu
Mauliate ma di Tuhanta,
Ai nunga tipak hamu marjabu
Tubu ma simarlasuna,
Lata ni tobu di holangholangna
Sai hot ma jabunta on di batuna,
Jala togu di hajongjonganna
Marmutik ma tabutabu
Dompak mataniari
Gok ma jolma di jabu
Jala gok ma hepeng di lamari
Panggu do panggisgis
Pangko ni bagot bahen hauna
Jabunta on ma na so ra tiris,
Huhut na togu di batuna
Duru ni hauma
Panuanan ni sanggesangge
Sahat ma hamu saurmatua,
Mangingani jabunta on huhut horas jala gabe
Andor ras ma tu andor ris
Tu andor ni Purbatua
Sai horas ma hamu sai torhis
Mangingani jabunta on, gabe jala saur matua
Umpasa modern
Manggoreng di balanga
Mardisir mardosor
Sai tubu ma angka boru na gabe sarjana,
Dohot angka anak pe na gabe profesor
Nakkok dalan tu Berastagi
Tuat dalan tu Medan,
Sai unang ma hamu pejalan kaki,
Naeng ma nian parmobil sedan
Hau gala-gala
Panjangkitan ni si Sakeus
Tudia pe hamu mangalangka
Sao tontong ma di ramoti Tuhan Jesus
Hata manang tona ni natuatua tu anakna siangkangan
Ho ma amang siboan ampang
Di pudim siboan silua,
Ho ma amang siboan sangap
Di pudim angka anggim dohot ibotom siboan tua
Jongjong di Uluan
Manatap tu Tampahan
Dapot ma na niluluanmu
Jumpang ma na jinalahanmu.
Baris-baris ni gaja
Di rura Pangaloan
Hata poda ni natuatua
Na ingkon do oloan
Molo nijua, na ro ma hamagoan, molo nioloan, na ro ma parsaulian
Songon i ma jolo na boi husurathon taringot umpasa ni halak Batak di tingki on, mangihuthon ragamna. Horas.. horas.. horas..!
*dari berbagai sumber*
NB: Ra.. hurang pungu (mungkin kurang lengkap) dope umpasa on, molo adong umpasa na asing diboto angka dongan panjaha, jala atik boha adong na sala manurat, boi ditongos di kotak komentar na ditoru on. Rade do admin paturehon. Mauliate..
Post a Comment for "Umpasa ni halak Batak"
Silahkan berkomentar bijak tanpa asumsi sesuai dengan topik artikel. Komentar spam atau share link yang tidak relevan akan dihapus. Terimakasih..