Tampulon Aek Do Na Mardongantubu

Sada turiturian na marimpola

Disada huta, adong ma sada sumur na binahen ni halak Bolanda najolo. Ia sumur on nunga gabe parjenggetan (keramat) di huta i.

Didok parjenggetan, dung adong ma jolma naeng manimba aek, tali dohot ember ni panimba i sai ditait sian toru, sampe godang do ember dohot tali na lonong di sumur i.

Nunga tung mansai leleng dang adong na mamboto ala ni aha asa songon i. Alani do angka jolma na marhuta di humaliang ni sumur i mandok: "adong mangingani gabe parbeguan"

Disada tingki, masa ma haleon potir (kemarau berkepanjangan), hape najolo andorang so masa mago timba di sumur i, sai sian i do mual ala so olo mahiang, tung pe haleon potir.

Marrunggu ma angka natuatua dohot raja adat mangalului aha do na masa di inganan ni muali. Jala sotolop ma nasida asa adong ma tuat tu bagas sumur na gabe parjenggetan i. Dang adong na barani na laho mamareso tu bagasan sumur i, ala ni biarna be.

Alai adong ma sahalak dolidoli na manghabaranihon dirina lao mangulahon pangidoan ni natorop i. Dohot pangidoan (syarat), hahana na dibariba ni huta i, ingkon dohot ma maniop tali i, molo jadi tuat ibana tu sumur i.

Hape diboto parhutai do na hea marbadai dolidoli i dohot hahana i, alani parbagianan arta ni among ni nasida. Pola do marsipisoan na marhaha maranggi i, ala ni posa ni bada i.

Situan na torop marsisungkunan:

"Boasa ingkon hahana i? Ala marbadai do nasida, hape torop do angka naposo dohot angka amaama na gogo na boi maniop tali i.

Alai dolidoli i mandok, ingkon dohot do hahana i. Ala dang adong na barani tuat tu sumur i, mardos ni roha ma nasida laho mangelek hahana i, asa olo maniop tali i.

Ditingki dipasahat tu hahana i pangidoan ni anggina i, parjolo dang olo hahana i. Alai ala sai dielek angka natorop, dang tarjuasa be.

Dungi dohot ma hahana i maniop tali i, jala nasida pe dang dope marsipangkulingan ala ni posa ni parbadaan ni na marhaha maranggi i.

Dung dibereng anggina i na dohot do hahana i maniop tali, pintor barani ma ibana tuat tu sumur i.

Dirahut ma gonting ni dolidoli i dohot tali na ganjang. Dung i, tuat ma ibana nangetnanget mangihuthon tu toru. Mansai torop do jolma na maniop tali i, jala dohot do hahana i.

Ngorngor do dibahen lao patuathon dolidoli i, sahat tu bona ni sumur i.

Sude do paimahon aha do na masa di toru.

Di bagasan sumur i, jumpang ni dolidoli i ma sada herek di ginjang ni sada batu na balga.

"On ma sibikkasi ni namasa on." Ninna roha ni dolidoli i, dibagasan rohana.

Dung i, digora ibana ma asa ditogu tali i. Laos diabing jala diboan ma herek i sian toru ni sumur i. Dung dibege situan natorop joujou sian bagas ni sumur i, pintor rampak ma muse nasida manogu tali i.

Mandapothon topi ni sumur i, pintor manjangkit ma herek i marhite tali ala dung dibereng na tiur, jala pintor mangangkat (melompat) ma sian abingan ni dolidoli i,

Ala parjolo haruar herek sian sumur i, pintor humarambur ma angka natorop i, ala ni biarna mamereng herek na haruar i, jala dipalua natorop i ma tali i sian tanganna be.

Dirimpu nasida do dolidoli i nunga gabe herek, dibahen pangingani ni sumur parbeguan i.

Alai anggo hahana i, sai ditiop do gomos tali i. Pola do sampe malaklak tangan ni hahana i maniop tali i, asa unang madabu anggina i tu bona ni sumur i. Na satolap ni gogona, ditogu ibana sandiri do anggina i sian sumur i.

Dung ditogu hahana i anggina i tu ginjang, marsihaolan ma nasida jala rap tangis. I pe asa ro muse situan natorop manjonoki nasida.

Dung i pe diantusi situan natorop i, boasa ingkon sai margogo dolidoli i mandok ingkon dohot hahana i maniop tali i. Molo so disi hian hahana i, nunga madabu ibana tu toru, jala olo do mate ala ni bagas ni sumur i.

Mulai sian i, lam jonok ma muse nasida na marhaha maranggi i.

Marhite i, boi ma dipangke muse mual na adong di sumur i. Las ma rohani par huta na adong di haliang ni sumur i.

Sidung..

Impola:

Haha anggi dohot pinaribot na sarurutan do na boi sihaporseanan na rade mangurupi ditingki las ni roha, tarlumobi ma di dok ni roha.

Molo adong na marsalisi angka na marhaha maranggi dohot na mariboto, diingot ma turiturian on asa tubu roha na mangkuling laho mardame.

Ingkon sada do songon dai ni aek, unang mardua songon dai ni tuak.

Masiaminaminan ma songon lampak ni gaol

Masitungkoltungkolan ma songon suhat di robean

Horas ma...!