Puisi Cinta Batak, Andung Ni Siboru Na Agoan Rongkap
 |
| Puisi Cinta Batak, Andung Ni Siboru Na Agoan Rongkap |
Alai di ari ni ulaon naung nitolopan
Sidoli ndang patudu bohi
Ngolungki tarmali tondi
Rohangku sai marsungkun boasa ho ito doli mangose padan
Sungkun-sungkunna sahat tu saonari
Sahat tu bot ni ari-aringki
Sai mangullus soada maralus
Ahu ma i siboru na tinubuhon
Alai na so hea manghatubuhon
Na dijou dainang sian pinompar na so hea sorang
Na dijou ompungboru nang pe so marpahompu
Aha be lapatanna ahu marpangir
Pasuda-suda pati ni harambir
Ia soada ibana na mandok tu ahu: "Angur obukmu"
Aha be lapatanna ahu martapian
Pajengkar-jengkar pahean
Ia so adong ibana na manjouhon tu ahu: "Hasian..!"
Ahu ma i na mangiburu
Pabereng-bereng dongan satorbang ditogu-togu pahompu
Na di jabu hundul ngolngolan
Na di onan soada dongan
Tung unang ma ho margundokpong ale tondingku
Molo di tingki parborhathi soada na tarilu
Molo di tingki i goar dohot ari hasosorangku ditariashon
Diuduti dohot pandohan: "Ndang hea marhamulian"
Ompung Mulajadi Na Bolon, molo tung boi ma ahu marsungkun
Boasa ingkon songon on bagian
Mangolu soada na sinarihon
Monding soada na tininggalhon
Ito doli hasian
Boasa ho mangose padan?
Oleh: Panusunan Simanjuntak
Post a Comment for "Puisi Cinta Batak, Andung Ni Siboru Na Agoan Rongkap"
Silahkan berkomentar bijak tanpa asumsi sesuai dengan topik artikel. Komentar spam atau share link yang tidak relevan akan dihapus. Terimakasih..